Descrición

O Curso "Axenda 2030. Axentes do cambio" ten unha duración de 30 horas e vai dirixido ao alumnado da Universidade de Vigo que teña un forte compromiso coa protección do medioambiente e coa erradicación das desigualdades no mundo.

A Axenda 2030 é unha resolución da ONU aprobada en 2015 que constitúe a folla de ruta da humanidade para os vindeiros anos. Centrada na protección medioambiental e na erradicación de todo tipo de desigualdades, a Axenda busca que as universidades se impliquen na xeración das condicións para acadar un desenvolvemento máis sostible e inclusivo tendo en conta as limitacións do planeta e o benestar das persoas a través da aplicación dos denominados «Obxectivos de Desenvolvemento Sostible» (ODS).

O principal obxectivo deste curso é formar a estudantes para que desenvolvan unha acción de voluntariado nos tres campus da UVigo na que dean a coñecer o contido da Axenda 2030 e os seus 17 ODS mediante paneis informativos e a organización de actividades.

O curso contará con 25h de formación virtual en FAITIC na que o alumnado accederá aos contidos sobre a Axenda e a vídeos explicativos. As/os estudantes terán unha participación activa a través de foros de debate online e contarán en todo o momento co asesoramento e titorización do equipo docente tanto para elaborar as actividades como para resolver dúbidas

Para completar a formación virtual, o alumnado asistirá a unha sesión de 5 horas presenciais no campus onde estuda un Grao ou Máster na que realizarán obradoiros dirixidos a preparar a acción de voluntariado.

Entidades organizadoras

Vicerreitoría de Responsabilidade social, Internacionalización e Cooperación

Información sobre o calendario (datas)

Prazas e créditos

Destinatarios/as

Esta actividade está destinada ao estudantado dos tres Campus da Universidade de Vigo.

Obxectivos

Ao rematar esta formación, o alumnado será quen de

• Promover, alentar e fomentar a participación da comunidade universitaria na aplicación dos Obxectivos de Desenvolvemento Sostible na área local.
• Xerar cambios reais nos tres campus que favorezan o aliñamento das políticas da Universidade de Vigo coa Axenda 2030.
• Consolidar unha comunidade de "Axentes do cambio" organizada en grupos de traballo cooperativo.

Calendario

• 15 de outubro - 15 de novembro: formación en Faitic
• 16 de novembro - 16 de decembro: obradoiro presencial (informarase ao alumnado do día exacto da impartición das 5 horas de formación presencial por Campus)

Programa

• Módulo 1. Comprendendo a Axenda 2030
• Módulo 2. As persoas
  • Submódulo 1: os primeiros pasos
  • Submódulo 2: camiñando cara á igualdade
• Módulo 3. O planeta
  • Submódulo 1: protexendo a biosfera
  • Submódulo 2: promovendo a economía circular
• Módulo 4. Unindo ás persoas e ó planeta

Impartido en

A formación virtual impartirase a través de FAITIC e a formación presencial desenvolverase nos Campus de Pontevedra, Ourense e Vigo.

Observacións

Acreditación da asistencia:

A superación desta actividade formativa será acreditada pola Universidade de Vigo a todas as persoas matriculadas que obteñan a cualificación de apto/a na parte non presencial (FAITIC) e asistan á sesión presencial.

Profesorado

Raquel Gómez Villar, Cofundadora en SomosTerra

Eva López Quiroga, Cofundadora en SomosTerra