Descrición

Información sobre o calendario (datas)

Prazas e créditos

Destinatarios/as

Obxectivos

A finalidade do curso é facilitar ao profesorado unha pauta de actuación sobre o que significa exercer a docencia nun contorno virtual como complemento a súa docencia presencial, situación coa que se deberán enfrontar a partir da aplicación do modelo de ensino-aprendizaxe xurdido do Espazo Europeo de Educación Superior (EEES).

¿Como se poden enfocar as titorías coa axuda dos contornos virtuais? ¿Como se debe elaborar e/ou presentar o material e os contidos cando o contacto presencial entre profesor/a e alumno/a se reduce? ¿Como podemos motivar ao alumnado nesta nova situación? ¿Que estratexias son aconsellables desenvolver para que o alumno/a poida asimilar os contidos sen a presenza do profesor/a?

O curso consta de dúas partes, un Seminario virtual e un Seminario presencial, que se complementan. Polo tanto, é imprescindible a presenza activa no seminario virtual para un adecuado aproveitamento da parte presencial. No primeiro, afróntanse as diferenzas básicas entre as dúas formas de docencia, que deben ser necesariamente distintas, a partir da reflexión sobre os cambios e da discusión sobre exemplos prácticos. No segundo, analizaranse e discutirán varios casos desde un enfoque eminentemente práctico.

Criterios de selección

Calendario

Trátase dun curso semipresencial, cunha duración dun mes para a parte virtual (equivalente a 2 ECTS) e tres sesións presenciais de 4 horas cada unha.

Xornada de presentación por videoconferencia: O día 22 de abril de 10:00 a 11:00 horas na Sala de Audiovisuais da Biblioteca Central, no Campus de Ourense.

Parte virtual: Do 23 de abril ao 20 de maio.

Parte presencial:

Impartirase os días:

21 de maio de 10:00 a 14:00 e de 16:00 a 20:00 horas
22 de maio de 9:30 a 13:30 horas

Programa

Bloque 0: Videoconferencia

“Presentación”

( Sesión matinal )

A sesión de presentación do curso será realizada polos profesores do curso dende a UOC e poderá seguirse a través de videoconferencia dende a Sala de Videoconferencia da Biblioteca Central de 12:00 a 13:00 horas o 22 de abril de 2009.

Bloque 1: Seminario Virtual

“Enfrontarse á docencia virtual”

( 1 mes de docencia virtual )

Terá unha duración dun mes, e desenvolverase na plataforma Claroline (FaiTIC) da Universidade de Vigo, por medios asíncronos. Disporase dun material de lectura e consulta e estableceranse unha serie de actividades para realizar neste período de tempo, que serán moderadas, asesoradas e avaliadas por dous profesores da UOC. Os participantes compartirán espazos comúns de discusión e intercambio das súas experiencias.

Obxectivos

Os obxectivos deste seminario exprésanse nas seguintes competencias xerais que os participantes deberían ter adquirido ao finalizar o mesmo:

• Capacidade para percibir o significado do cambio no rol e acción docente que requiren os procesos de ensino e aprendizaxe abordados coas novas tecnoloxías, tendo en conta o contexto, os medios e a modalidade de formación na que estes se enmarquen.
• Habilidade para recoñecer e evitar os tópicos asignados a uns e outros modelos de ensino, segundo sexa o contorno no que se desenvolva o proceso e as ferramentas coas que se conta, para comprender que o uso das novas tecnoloxías non produce por si só metodoloxías docentes máis eficientes.
• Coñecemento das competencias características da docencia con novas tecnoloxías, e tamén das súas tarefas e funcións, para desenvolvelas e poñelas en práctica de xeito adecuado segundo o modelo de ensinanza con novas tecnoloxías no que se participe.

Contidos

1. Cambios na acción docente: da presencialidade á virtualidade.
2. Funcións e tarefas da docencia con novas tecnoloxías: deseño e planificación da formación.
3. As competencias docentes no uso formativo das novas tecnoloxías.
4. Resistencias e expectativas do docente presencial cara a docencia virtual.

Bloque 2: Seminario Presencial

PROCESOS DOCENTES CON APOIO DE CONTORNOS VIRTUAIS

(12 horas)

Día: XOVES, 21 de maio do 2009.

Horario: de 10:00 a 14:00 e de 16:00 a 20:00 horas

Día: VENRES, 22 de maio do 2008.

Horario: de 9:30 a 13:30 horas

O seminario presencial consistirá en tres sesións (1 día e medio) de análise de casos e resolución de problemas vinculados a situacións reais na docencia, fundamentalmente semipresencial.

A metodoloxía será eminentemente participativa, de xeito que as inquietudes do profesorado queden reflectidas na análise e a solución dos casos formulados. Requirirase unha participación activa e unha máxima implicación no desenvolvemento do seminario.

Será conducido por dous profesores da UOC.

Obxectivos

Os obxectivos formularanse, de novo, en forma de competencias a adquirir:

• Poder intervir, crítica e creativamente, na análise e desenvolvemento de propostas docentes que incorporen o uso do e-learning na docencia presencial.
• Dispor dos criterios apropiados para identificar os factores críticos dun escenario formativo no que deben intervir as novas tecnoloxías.
• Habilidade para deseñar accións formativas complementarias á presencialidade, a partir da análise de experiencias.

Contidos:

• Caso 1: A transformación dunha proposta formativa presencial
• Caso 2: O deseño dun curso en liña
• Caso 3: A creación de contidos